කන්ද උඩරට රාජධානියට අයත් මධ්‍යම පලාතේ මාතලේ දිස්ත්‍රික්කයේ වත්තේගම පාතදුම්බරදී 1969.01.27 වෙනි දින මෙලොව එළිය දුටු කුමාරයාට දසනායක මුදියන්සේලාගේ උදේනි නිමල් කුමාර යනුවෙන් නම් තබන ලදි.සහෝදරයන් එක්කෙනෙක් හා සහෝදරියන් හතර දෙනකුගෙන් යුත් පවුලේ බාලයා වූ උදේනිගේ මව්පියන් ආගම දහමට ලැදි වූවන් වූහ. පවුලේ අය 1971 වර්ෂයේ දී නුවරින් දඹුල්ලට ගොස් පැල්වෙහෙර ග්‍රාමයේ පදිංචි වූහ. 1979 වසරේදී තම පියාගේ අභාවයෙන් පසුව තම පාසල් මිතුරෙකුගේ පැවිදිවීම දැක තමාටද පැවිදි වීමට අවශ්‍ය බව මවට දැන්වීමෙන් පසු 1982 නොවැම්බර් මස 28 වෙනි දින ශාලිය ආරණ්‍ය සේනාසනයේදී පැල්වෙහෙර සුසීම යන නමින් පැවිදි දිවියට පත්විය. විසි වයස් සපිරීමෙන් පසු 1989 ජූලි මස 7 වෙනි දින මහරගම සිරි වජිරඤාණ ධර්මායතනයේ දී පූජ්‍ය පාද මඩිහේ පඤ්ඤාසීය නාහිමිගේ උපාධ්‍යත්වයෙන් හා පූජ්‍ය පැළෑනේ පඤ්ඤානන්ද මාහිමිගේ ආචාරීත්වයෙන් උපසම්පදා විය. 1991 පෙබරවාරි 14 වෙනි දින ගුරු හිමිගේ අභාවය සිදුවිය.පන්සලේ හා දායක පින්වතුන්ගේ සියලු ආගමික ජාතික සාමාජික කටයුතු මැනවින් ඉටු කරමින් වැලිගම ප්‍රදේශයේ ජීවත්වන සියලු ජාතීන් සමඟ සුහදශීලීව කටයුතු කරන අතර සමාජ සේවා කටයුතුවල නිරත වී ක්‍රියා කරන හිමි නමකි. වයසින් 56 වියේ පසුවෙන පැල් වෙහෙර සුසීම හිමියන්ට එක් පැවිදි ශිෂ්‍යයෙක් සිටින අතර ඒ පූජ්‍ය රජවක ධම්මතිලක හිමියන්ය. උන්වහන්සේ ගෞරව ශාස්ත්‍රවේදී උපාධියක් ලබා උසස් අධ්‍යාපන කටයුතු හා සමාජ සේවා කටයුතුවල නිරතවී ක්‍රියා කරනු ලබයි. පැළෑන ගංගාරාම මහා විහාරාධිකාරී පූජ්‍ය පැල් වෙහෙර සුසීම ලොකු හාමුදුරුවන් වහන්සේට නිදුක් බව නීරෝගී බව ලැබේවායි ප්‍රාර්ථනාකරමි.